«Бір шаңырақ астында» фестивалі – бірлік пен шығармашылық алаңы
2026 жылғы 30 сәуір күні Семей қаласындағы Жастар сарайында Қазақстан халқының бірлігі күніне арналған «Бір шаңырақ астында» атты облыстық шығармашылық фестивалі өтеді. Іс-шараны IT және жаңа технологиялар жоғары колледжі ұйымдастырады.
Фестивальдің басталуы — 11:00. Бұл мәдени-шығармашылық жоба жастардың әлеуетін дамытуға, жаңа таланттарды анықтауға және түрлі этностардың өнері мен мәдениетін кеңінен насихаттауға бағытталған. Сонымен қатар, іс-шара қоғамдағы татулық пен өзара түсіністікті нығайтуды көздейді.
Фестивальдің ерекшелігі — оның халықаралық деңгейде өтуі.
Шараға Ресей Федерациясынан Томск мемлекеттік басқару және радиоэлектроника жүйелері университеті мен Барнаул қаласындағы Алтай өнеркәсіптік-экономикалық колледжінің студенттері мен оқытушылары қатысады.
Қатысушылар ұлттық билерін, шығармашылық өнерлерін және ұлттық тағамдарын ұсынып, әртүрлі номинациялар бойынша өзара бақ сынайды. Бұл фестиваль жастар арасындағы мәдени алмасудың маңызды алаңына айналмақ.
